Banco Santanderrek itxi egin du Banestok Baldespinan zuen bulegoa

Banco Santander entitateak Ermuan zituen bi bulegoetatik bat itxi egin du martxo honetako hilaren hasieran, hain zuzen ere Ermuko Valdespina Markesaren 14ko etxebizitzaren behean –Kaltxango biribilgunean eta 634-nazionalaren aurrean-  zuena. Bulego hori taldean sartu zen 2012aren abenduan Banesto eta Banif izenekoak Santander Bankuan integratu zirenean. Integrazioaren ondoren sukurtsalak Banesto zenaren irudi eta markak mantendu zituen, aurtengo urteko hasi bitartean, urtarrilean Santander taldearen kolore gorriak jarri baitzizkioten kanpotik, Botin presidentearen taldekoen itxuraz utziz. Nolanahi ere, martxoko lehen egunetan langileek kanpoko errotuluak eta kutxazain automatikoa erretiratu egin zituzten, lokala hustu eta itxiz. Harrez geroztik, pertsianak itxita daude eta ez du berriro aterik ireki. Atearen goian ohar bat jarrita dago, non Konbentukoa kaleko sukurtsalean atenditzen dutela adierazten den.

Honakoarekin eta krisialdia edo banketxe sektorearen berregituratzea hasi zenetik eta integrazioak direla medio gure herrian ateak itxi dituen hirugarren entitatea da. Iazko 2013. urtean bulegoak itxi zituzten Ipar Kutxak eta Gipuzkoako Kutxak (GK-k). Lehena Laboral Kutxan kooperatiban txertatu izanagatik, Probalekun zuen lokala utzi zuen. Antzeko kasua izan zen Gipuzkoa Kutxarena, Bizkaia Etorbidearen 8an zuen bulegoa apirilean hustu eta itxi baitzuen. Horren arrazoia, Kutxabank entitate berria eratu izanean dago, bertara BBK, GK eta Vital zirenak bildu zirelarik. Horiek horrela, Ermuan Kurtxabank erakundeak egun bi bulego ditu zabalik, eta kutxazainak dituen beste hirugarren bat baita ere.