Gaikako zabor bilketak gora egin du Debabarrenan

Debabarreneko Mankomunitateak 2014 eta 2015 urteetako gaikako zabor bilketaren datuen balantzea egin berri du. Ondorio nagusia da zifrak hobetzen ari direla urtetik urtera; birziklatze tasa %39,66ra iritsi da gure eskualdean.

2014ko datuekin alderatuta, birziklatze tasa ia lau puntu igo da. Gainera, azken bost urteetan, gaikako zabor bilketa %20tik (2011n) ia %40ra pasatu da 2015ean, ia bikoitza.

Mankomunitateak eskainitako zifrak modu xehean azaltzeko, gure eskualdean 29.108 tona zabor kudeatu dira; horietatik 11.321 tona (%39,66) gaika jaso dira, 17.564 tona (%60,34) errefusa izan dira, eta 231 tona, aldiz, autokonposta.

Zer jaso da gaika Debabarrenan? Orokorrean, materia organikoa da gehien bildu dena: 3.185 tona. Paperak gertutik jarraitzen du, 3.003 tonarekin, eta atzetik, beira (2.024t) eta ontzi arinak (1.046t).

Ermuari dagokionez, herritar bakoitzak urtero 349,66 kilo zabor sortzen ditu, eta %35,67 birziklatzetik %36,29ra igaro da 2014tik 2015era; ia puntu bat gehiago. Gaikako bilketari begira, gure herriko datuak eskualdekoen desberdinak dira: papera da gehien birziklatzen dena (33kg pertsona eta urteko), eta materia organikoa bigarren lekuan gelditzen da (29,57kg pertsona eta urteko). Beira eta ontzi arinak gutxiago jasotzen dira: 22,74kg eta 14,14kg pertsona eta urteko, hurrenez hurren.

Datu eta zifra guztiak Debabarreneko Mankomunitateak eman ditu argitara, eta dokumentu honetan kontsultatu daitezke.