Asteartean irekiko dira San Martin azokarako izen-emateak

Hilabete pasatxo falta da 2024ko San Martin jaiari hasiera emateko. Azokaren XXXIV. edizioa azaroaren 9an, larunbatean, ospatuko da, eta Euskal Birusa kultur elkartea hasia da jada Ermuko egutegian ezinbesteko hitzordu hau prestatzen.

Datorren asteartean, urriaren 1ean, izena emateko epea zabalduko zaie azokan produktuak saltzeko postu bat izan nahi duten nekazari eta baserritarrei. San Martin erakusketa-lehiaketan parte hartzeko sei modalitate daude: fruta eta barazkiak, gazta, sagardoa, txakolina, ogia eta eztia. Kategoria horiek Bizkaiko udalerri guztietako ekoizleentzat dira, eta, salbuespen gisa, Eibarkoentzat. Gainera, 1.500 euro inguru banatuko dira saritan eta garaikurretan kategoria bakoitzeko postu onenen artean.

Standak Orbe Kardinala plazan eta ondoko kale eta plazetan kokatuko dira, eta toki bakoitza urriaren 30ean, asteazkena, arratsaldeko 19:00etan esleituko da Lobiano Kultur Gunean egingo den zozketa publikoan.

Azokan parte hartu nahi dutenek Abiapuntu bulegoan (Konbentukoa, 3) eman beharko dute izena, astelehenetik ostiralera, 08:00etatik 15:00etara, izen-emate orria betez eta beharrezko dokumentazioa aurkeztuz. Epea urriaren 11n amaituko da, ostirala, eta bete beharreko baldintza guztiak deialdiaren oinarrietan zehazten dira.

Garrantzitsua da azpimarratzea azokaren helburu nagusietako bat Ermuan euskararen erabilera indartzea dela, bai ahoz, bai bisualki. Beraz, antolatzaileek San Martin azokako parte-hartzaile eta bisitari guztiak animatzen dituzte auzokideen arteko harremanetan gure hizkuntza erabiltzera eta gure kaleetan hizkuntza gehiago erabiltzera. Aukera paregabea da lagunekin eta egun honetan bisitatzen gaituztenekin euskaraz harremantzeko. Azokarekin batera, Euskal Birusak denentzako egitarau anitza antolatuko du.

Nekazaritza azokaz gain, azaroaren 9an tokiko artisautza azoka txiki bat egingo da inguruko artistekin; hauek ere izena eman beharko dute urriaren 1etik 11ra euskalbirusa@gmail.com helbidera mezu bat bidaliz.