Azken egunak Valdespinako Markesaren aparkalekuan plaza eskatzeko

Ermuko Udalak igande honetan, uztailaren 21ean, itxiko du Valdespinako Markesaren aparkalekuko lehen solairuko garajea eskuratzeko izena emateko epea.

Aparkalekuak 57 plaza ditu: 52 leku arrunt autoentzat, bi ezinduentzat eta hiru motorrentzat. Aparkalekura sartzen diren ibilgailuen gehienezko altuera 1,95 metrokoa izango da. Lurzatiak jabari publikoko emakidaren erregimenean esleituko dira, 2076ko abenduaren 31ra arte.

Garaje-plaza baten esleipendun suertatzen den pertsona bakoitzak kanon bat ordaindu beharko du plaza entregatzen zaion unean. Kanon horri Ondare Eskualdaketen eta Egintza Juridiko Dokumentatuen gaineko Zerga (JTO eta EJD) gehituko zaio, hau da, kanonaren %4a. Horrela, partzela bakoitzaren azken prezioak honako hauek dira:

• Autoentzako plaza: 18.000 euroko kanona + 720€ JTO eta EJD zerga kontzeptuengatik = 18.720 euro
• Motoentzako plaza: 6.000 euroko kanona + 240€ JTO eta EJD zerga kontzeptuengatik = 6.240 euro

Esleipenerako baldintzak

Valdespina Markesaren parkingerako plaza eskuratu ahal izateko baldintza gisa, lehenik eta behin, udalerrian erroldatutako pertsona fisikoa izatea da, parte hartzeko eskaera egin baino gutxienez hiru hilabete lehenagotik. Bigarrenik, eskatzaileak Ermuan Trakzio Mekanikoko Ibilgailuen gaineko Zergan alta emanda dagoen eta zerga hori ordainduta duen ibilgailu baten jabea izan beharko du gutxienez. Desgaitasuna duten pertsonen kasuan, aipatutako aparkatzeko baimen txartela erantsi beharko da eskaeran.

Azkenik, eskatzaileak ezin izango dira Ermuko udalerrian emakida administratiboko aparkaleku baten edo gehiagoren titular izan. Alderdi hori erantzukizunpeko adierazpen baten bidez egiaztatuko da.

Esleipen-prozesuan parte hartu ahal izateko, eskaera-orria behar bezala beteta eta sinatuta aurkeztu beharko da. Gainerako baldintzak ofizioz egiaztatuko dira, mugikortasun urriko pertsonentzako aparkatzeko baimen-txartela izan ezik, hori interesdunak berak aurkeztu beharko baitu.

Eskaerak uztailaren 21era arte, igandea, aurkeztu ahal izango dira, Abiapuntun ostiralera arte 08:00etatik 14:00etara edo Ermuko Udalaren Egoitza Elektronikoan eguneko 24 ordutan.

Irailean argitaratuko da onartutako eta baldintzak ez betetzeagatik baztertutako pertsonen zerrenda. Alegazioak aurkezteko epea amaituta, prozesuan onartutako pertsonen behin betiko zerrenda ezarriko da, eta eskainitako plaza kopurua baino gehiago badira, zozketa publiko batean parte hartuko dute. Urrats hauek amaitzean, emakida formalizatu ahal izango duten esleipendunak iragarriko dira. Pertsona bakoitzari aparkaleku bakarra esleituko zaio gehienez.

Sarrera doan esleipenera arte

Urteko azken hiruhilekoan Valdespinako Markesaren 57 aparkalekuak esleitu arte, aparkalekua irekita dago, doako sarrerarekin, astelehenetik igandera 24 orduz.