Iñigo Ugenak, brontzezko domina jantzi du pertikan 23 urtez azpiko Espainiako Txapelketan

Iñigo Ugena Fernández atleta (Reala, atletismo atala) hirugarren izan da eta brontzezko domina jaso du pertika jauzian Salamanca hirian azken asteburu honetan jokatu den 23 urtez azpiko XXXVI. Espainiako Txapelketa pista estalian. Ermuarra podiumera igo da eta brontzezko metala lortu du 5 metro eta 5 zentimetroko altuera gainditu ondoren. Hirugarren eta azken saiakeran lortu du, hori balekoa izan eta gero. Ondoren, 5,15 metrotan saiatu da, eta ezin izan du gainditu, hiru saialdi baliogabe egin ondoren. Iñigok aurreko urteko marka eta emaitza berberak errepikatu ditu, iaz txapelketa Nerjan (Malagan) jokatu zenean.

Ermuar gazteak podiumera igo da Javier Fernández Cascalesekin (Fent Camí Mislata Atletismo Klubekoa, 5,35 metroko jauzia egin eta bigarren geratu dena) eta Alex Gracia Gasullarekin (FC Bartzelona) batera (5,51 metroko jauzia egin duena).

Otsailaren 19 eta 20ko asteburu honetan, pista estaliko 23 urtez azpiko XXXVI. Espainiako Txapelketa jokatu da Salamancan. Laugarren aldiz azken bost urteetan, lehiaketa Gaztela eta Leongo Carlos Gil Pérez Pista Estalian ospatu da. Proban 23 urtez azpiko banakako tituluak ez ezik, Belgradeko Munduko Txapelketarako gutxienekoak ere jokoan izan ditugu. Guztira 464 atletek (248 gizon eta 216 emakume) izena eman dute.

Lehiaketa hau Covid-19aren pandemiaren bilakaeraren, lehiaketa egin den unean indarrean zegoen araudia zorrotz betetzearen eta agintari nazionalek eta nazioartekoek kutsatzeko arriskuak minimizatzeari dagokionez prebentzio-, arintze- eta babes-neurriei buruz ezarritako jarraibideen mende egon da.

Txapelketa Gaztela eta Leongo Atletismo Federazioak antolatu du, RFEAk ordezkatuta, tokiko erakundeekin, Salamancako Diputazioarekin eta Salamancako Udalarekin batera. Hiru saio jokatu dira: bi larunbatean, goizez eta arratsaldez (10:00etatik 13:30era eta 17:00etatik 21:05era), eta bat igandean (10:00etatik 13:50era). Txapelketa streaming bidez eskaini da LaLigaSportsTV plataforman.