"Cuando acecha la maldad" eta "Chicas malas" protagonista Ermua Antzokiko zine egitarauan

Otsaileko bigarren zine astea hasteko prestatzen ari da Ermua Antzokia. Ostegunetik astelehenera, gustu guztietarako lau film berri emango dira: lehenengoa, zineklub saioaren barne eskainiko den La memoria infinita dokumental txiletarra. Augusto, Txileko kultur kazetari ezaguna, eta Paulina, aktorea eta kultura ministro ohia, elkarrekin eta maiteminduta egon dira duela 25 urte baino gehiagotik. Augustoren oroimena ahultzen hasten denean, haien arteko harremanak berrasmatzen ikasiko dute, argi utziz haien maitasuna eta umorea hautsezinak direla. Maitasunari eta oroitzapenari buruzko kontakizun eder hau ostegunean proiektatuko da, 20:30ean.

Zinema komertziala hilaren 10ean hasiko da, larunbata, 19:30ean, Demián Rugnak zuzendutako Cuando acecha la maldad film argentinarraren lehen emanaldiarekin. Urruneko herri batean, bi anaiek gizon bat aurkitzen dute, indar gaiztoz kutsatua, deabru bat erditzear. Gaizkia bere mundu baketsura sar ez dadin etsita, anaiek egia beldurgarria aurkituko dute: jada beranduegi da. Aterrados (2017) filmaren arduradunaren lan berriak eserlekuari itsatsita mantenduko gaitu deabruen jabetzei buruzko kontakizun urduri eta aztoragarri honekin. Cuando acecha la maldad astelehenean ere ikusi ahal izango da, 20:30ean.

Asteko bigarren film komertziala Chicas malas izango da, Tina Feyren sormen umoretsutik heltzen den izen bereko klasiko modernoaren itzulera musikala. Cady Heron ikasle berriari ongietorria egiten dio kate sozialaren gailurreko "Las Plasticas" izeneko neska ezagunen talde elitistak, Regina George erregina eta bere Gretchen eta Karen sekuazeek gobernatua. Hala ere, Cadyk Reginaren mutil-lagun ohiarekin, Aaron Samuelsekin, maitemintzearen akats larria burutzen duenean, Reginaren jomugan jarriko da. Janis eta Damian lagun baztertuen laguntzarekin, Cadyk Reginarekin akabatu nahi du eta bere buruarekiko leial izaten ikasi nahi du oihanik gupidagabeenean: institutuan. Chicas malas larunbatean 22:00etan eta igandean 19:30ean izango da ikusgai.

Haurrentzako zinemari dagokionez, igandean, 17:00etan, Patrick animaziozko film kanadarra proiektatuko da, Patrick izeneko hegal bakarreko tximeleta ausart eta maitagarri baten istorio hunkigarria. Bere lagunik onenarekin, Marty izeneko beldarra, eta Jennifer, altuerari beldur dion tximeleta, Patrick ustekabeko heroi bihurtuko da.