Santixauetako Padel Txapelketako izen emateak zabalik ostiralera arte

Santixauak 2024 gain-gainean ditugu jada, eta ohiko musika eta jai-giroko jarduerekin batera, udako hainbat kirol lehiaketa ere hastear dira. Pala zaleentzat, El Sartenazo padel talde ermuarrak 2024ko Santixauetako Txapelketa antolatu du. Izena emateko epea uztailaren 5era arte dago zabalik.

Txapelketaren seigarren edizioa uztailaren 13tik, larunbata, hilaren 21era, igandea, bitartean jokatuko da, San Pelaioko udal padel pistetan, Aritzmendi pilotalekuaren atzean. Hiru kategoriatan banatzen da lehiaketa: gizonezkoak, emakumezkoak eta bikote mistoak. Txapelketa egin ahal izateko, kategoria bakoitzean gutxienez 4 bikote beharko dira, eta gehienez 32.

Lehen partidak datorren asteburuan jokatuko dira, 09:00etatik aurrera, eta hilaren 15etik (astelehena) 19ra (ostirala), egunero, 17:00etatik aurrera. Larunbatean, hilak 20, goizeko ordutegiari helduko zaio berriro, 09:00etan, eta finalak igandean jokatuko dira, hilak 21, 10:00etan. Maila bakoitzeko bikote txapeldun eta txapeldunordeek sariak jasoko dituzte finalen ondoren, eta torneoari amaiera emateko, lunch bat egingo da parte-hartzaile guztiekin eta zozketak izango dira.

Txapelketan parte hartzeak 30 euroko kostua du bikote bakoitzeko, eta ongietorri pack bat entregatuko da. Izen-emateak Xporty plataforman egin beharko dira eta epea uztailaren 5ean amaituko da, 23:00etan.